香港嘅黃絲，由黃政客、黃學者到黑暴，個個滿口「熱愛香港」，但一有乜嘢風吹草動，首先顧及嘅卻係自己，第一時間執包袱走人離開香港，捨棄香港。呢種滿口「仁義道德愛香港」，結果漏夜搭飛機走人嘅黃色膠劇，過去兩年幾，已經喺香港國際機場上映過無數齣戲，最新一套就係夥拍鍾庭耀搞香港民意研究所嘅鍾劍華。喺剛過去嘅周日（24日），鍾劍華也搭飛機飛咗去英國。

鍾劍華今次突然離港赴英，顯然係狼狽走佬，佢喺自己嘅社交平台貼文話「抱歉不辭而別」。走得咁急，莫非又係應驗咗嗰句「若要人不知，除非己莫為」？有媒體據說聯絡到鍾劍華，鍾宣稱「早前被警方根據《港區國安法》約談，但詳情不便透露」。被警方約談，又唔係拘捕，連警戒會面都談不上，點解就驚到要即刻買機票飛去英國？鍾劍華咁做，有冇諗過會引起市民對佢「此地無銀三百兩」嘅遐想？如果行得正，企得正，警方要求協助調查實屬平常，使乜驚到要即刻離開香港，仲話「打算在海外生活一段時間」？

鍾劍華仲話「本來一直都沒有移民念頭，畢生的職志和擔當，都在香港」，但係為咗唔想「令很多愛護他、關懷他的親人及朋友為他擔憂，更不願父母為可能發生於他身上之事而憂戚」，所以不得不走。鍾嘅呢番臨別感言，聽落好似有啲令人無奈傷感嘅感覺，但諗深一層，卻令人有種「似曾相識」嘅播音機感覺。因為個個黃絲黃友，仲有嗰啲為咗逃避法律責任而離港嘅逃犯，例如許智峯之流，有邊個臨走嗰陣唔係都係講類似嘅同一番說話？佢哋個個講嘅都係同一個調子，所謂「無奈離開」其實就係卸膊，講一套做一套，呢種魯迅筆下祥林嫂呻命苦嘅千篇一律，香港人早已聽到厭。所以鍾劍華同黃友們與其呻自己「不得不走」，倒不如反思乜嘢叫做「食得鹹魚抵得渴」，咁樣做人會公道啲。搞大咗件事，就想唔負責任一走了之，當冇事發生，呢個世界邊有咁便宜嘅事？至於講到唔想朋友、親人、父母為自己憂慮，唔知鍾劍華又記唔記得「早知今日，何必當初」呢八個字？

鍾劍華喺香港民意研究所擔任副行政總裁，呢個所謂嘅「民意研究所」，究竟研究啲乜嘢嘅「民意」，相信好多人未必清楚。其實呢個「民意研究所」喺2020年曾經夥同戴耀廷等人舉辦違法嘅「35+初選」，其中大批參與該次非法初選嘅政客，已因涉嫌違反《港區國安法》被捕，至今大部份人仍然被羈押候審。

鍾庭耀利用「港大」呢個招牌喺香港搞咗20幾年嘅所謂「民意調查」，喺香港政壇興波作浪，同反對派關係密切。之後鍾庭耀夥拍鍾劍華，將「港大民意研究計劃」轉型為「香港民意研究所」，仲大張旗鼓幫攬炒派搞非法初選，相信大家都對呢個「民意研究所」嘅底細一目了然。

而鍾劍華喺社交平台自行公布嘅離港消息，以「不願作逃兵 無奈需避秦」為題，單睇題目就十分滑稽可笑。既然已經做咗逃兵，又有乜嘢「願」或「不願」？講到「無奈需避秦」，更令人懷疑鍾劍華究竟有冇當過自己係中國人？全世界都睇得出美國呢個世界第一霸權，已經將中國視作頭號眼中釘，欲將中國除之而後快。

中國明明係受美國打壓嘅一方，香港係中國嘅一個特區，作為香港特區嘅中國人，即使政見各有不同，但面對霸權美國嘅亡華之心，大家唔係應該先將所有分歧放低，槍口一致對外，同仇敵愾嘅咩？所以鍾劍華嘅「避秦」好明顯係擺錯咗自己嘅位置，冇將自己當成一個中國人。如果真係要「避秦」，鍾劍華要避嘅應該係美國，而唔係中國，更加唔係中國香港。幫美國壓制中國成功，對香港有乜益處？對包括香港人在內嘅14億中國人又有乜益處？相信唔係智商有問題嘅人，都會知道答案，懂得選擇。所以鍾劍華與其話自己係「避秦」，倒不如話自己係「朝秦暮楚」。

俗語有云，「平生不作虧心事，夜半敲門也不驚」。鍾劍華咁驚，驚到要做逃兵，急急腳走去英國，講到底其實就係「心虛」兩個字。香港有唔少呢啲人，睇吓下一齣走佬好戲幾時上映，由邊個擔綱演出。

原圖：

 

投票已截止，多謝支持