去年底拒絕參選立法會的民主黨，最近又有新聞了。民主黨主席羅健熙日前接受訪問時透露，該黨將於年底改選領導層，而為了「減少風險」，除正副主席外的中委會人數，預計將由目前的14人減至10至12人。
看到這則新聞，相信好多人都會覺得民主黨除了越來越無厘頭，更一再陷入自欺欺人。「減少中委人數以減少風險」，這是什麼的「神邏輯」？如果唔係存心想犯法，做民主黨中委點解會有「風險」？所以羅健熙的「減少風險論」，反映嘅其實係一種此地無銀三百兩嘅心虛。平生不作虧心事，夜半敲門也不驚，唔知民主黨黨員有冇聽過呢句話？
犯法就係犯法，一個人犯法， 十個人犯法， 十四個人犯法，無論幾多個人犯法，始終都要接受法律制裁。所以「減少中委人數就可以減少風險」嘅諗法，根本係掩耳盜鈴。如果按照佢哋嘅計劃，留低下來繼續做民主黨中委嘅人，唔通個個又係諗住自己做「乜乜死士」，準備入獄去陪黎智英？理想好豐滿，但現實好骨感，如果唔係，前民主黨要員許智峯，都唔使落得畏罪潛逃嘅下場！
講到民主黨嘅未來動向，羅健熙對住記者天花亂墜了大半天，但始終講不出民主黨未來打算走邊條路。一個政黨存在的最大意義就是參政議政，儲備政治能量，發揮對政策的影響力。民主黨去年底已經杯葛了一次立法會選舉，對於黨內想參選的人也諸多阻撓，如果繼續拒絕參選，還有什麼存在意義？
對於上次立法會選舉冇派人參選，羅健熙說是「單次決定」。對於將來會否派人參加區議會選舉，佢就話：「睇唔到有乜理由不參選。」呢種講法，一句講晒，就係模棱兩可，可能係故弄玄虛，亦可能係政治精神錯亂。民主黨已經迷失，唔知自己想點。
杯葛選舉只會自己慢慢陰乾
這是可以想像的。面對黨中一些大佬例如李永達、單仲偕等人都已心虛避走英國，經常做騷吸引閃光燈嘅林卓廷、許智峯，一個正在獄中還押，一個已經着草走佬。最要命的是，一直以來都係民主黨大金主嘅黎智英也正在獄中羈押，出獄無期。沒有了「大水喉」，又失去了大量區議員和立法會議員上繳薪金，如果繼續杯葛選舉，民主黨就只有死路一條，「香港民主黨」很快成為歷史名詞。
擺在羅健熙和民主黨當權派面前只有兩條路，一就係繼續玩消極對抗，玩杯葛選舉，自己慢慢陰乾影響力，最終解散執笠。二就係在「愛國者治港」原則下派人參選，改弦易轍，不再與反華外國勢力眉來眼去，專心一致成為特區政治參與的一股正面力量。
因應完善選舉制度規定，無論是參選選委、區議員、立法會議員抑或特首，都要經過參選資格審查委員會的審查和確認，才能夠正式成為參選人。資審會其中一個審核重點，就是依據警方國安處的審查報告作出決定。無論什麼政治光譜，通過審核便能在「愛國者治港」原則下獲得參選資格。
愛國本就是天經地義的事！美國有無數的愛國法，美國的政客和政黨人人都以愛國者自居，但在香港，愛國卻被人長期扭曲和妖魔化，詭異地變成了一個負面的名詞。
民主黨若要走出生天，首先就要放棄過去的包袱，積極調整定位，以「愛國者」身份參選，才能避過解散的末路。唔通陪許智峯、黎智英攬炒，會是民主黨出路嗎？羅健熙和民主黨的當權派，自己要諗清楚，否則民主黨收檔是遲早嘅事。
原圖：
https://std.stheadline.com/realtime/article/1539916/即時-港聞-完善選舉制度-民主黨-區議員將迎合宣誓要求-是否參選立會仍有分歧
https://www.facebook.com/photo/?fbid=254208699403129&set=a.254208656069800