政府6月10日刊憲公布，撤銷民主黨前立法會議員楊森及單仲偕兩人的太平紳士委任，以及銀紫荊星章，即日生效。同樣，曾於2001年獲授榮譽勳章的佔中發起人、涉及多場香港政治動亂始作俑者的戴耀廷，也被褫奪有關嘉獎，從特區授勳及嘉獎名單中被正式剔除。

聽到這個消息，相信所有熱愛香港、和平守法的市民都會額手稱慶，大叫一個好字！天網恢恢，疏而不漏。飲完埋單，撥亂反正，終於降臨在呢班在香港長年累月貪勝不知輸，廿幾年來不斷搞風搞雨的政棍身上。今次佢哋被「搣柴」，也是物極必反，做人做事唔好做得太過份，否則必然報應不爽的警世故事。回望2019年的黑暴，爭取什麼都好，不同意見也沒有關係，但最終搞成暴力暴動、分裂國家嘅港獨，就必須承擔後果。

淪階下囚 咎由自取

楊森、單仲偕因參與2019年10月1日非法遊行，被控組織未經批准集結，雙雙被法庭判處罪名成立，同被判入獄14個月。只是單仲偕好彩，可以緩刑24個月，避過牢獄之苦。由風光無限嘅政治明星、立法會議員，淪為罪犯階下囚，這一切用「咎由自取」四個字就可以輕易解釋。

甘願做外國棋子，搞威脅國家安全嘅「革命」，在中國人的土地上這是一種癡心妄想。黑衣人要搞暴力民主、顏色革命，可以去英國搞，最好也去烏克蘭見識見識，總之包括香港人在內的14億中國人絕對唔會容忍。香港全面落實《港區國安法》和愛國者治港原則，就是最好的證明。實際上，全世界又有邊個國家會容忍分裂國家嘅所謂「民主運動」？而且仲係透過暴力！

而好似楊森、單仲偕呢類攞住香港授勳榮譽，享有高尚社會地位嘅政客，即使沒有參加黑暴街頭暴力，但對之沉默其實亦等同幫兇，同等罪論。更何況佢哋喺黑暴最瘋狂嘅時候，組織和參與非法集結，為香港動亂火上加油。正常普通人見到火燭都會幫忙撲火，但呢班頭上帶着特區「太平紳士、銀紫荊星章」光環嘅人，卻唯恐天下不亂，添柴放火，簡直係對香港授勳制度嘅一種褻瀆和侮辱。立心不良，其身不正，何來資格做太平紳士？

荼毒青年 令人髮指

至於被褫奪榮譽勳章嘅戴耀廷，更加係煽風點火嘅人辦。做大學法律系教授卻走去教人不守法，甚至犯法，無論用乜嘢堂而皇之嘅「理由」包裝，其實都係罪加一等。好可惜呢種知法犯法，必須罪加一等嘅常理，在過去十年已經被政治狂熱所掩蓋，使到這種平常的道理被扭曲，而且不經不覺間，變成了為求目的可以不擇手段嘅社會歪風迅速蔓延。最不幸的是大量入世未深嘅年輕學生心智受到蒙蔽，最終上映了連「放火燒活人」嘅冷血獸行，都竟有人叫好的令人髮指、令香港蒙羞嘅醜陋一幕。

早排楊森刑滿出獄，在監獄門口還大呼呼地表達乜嘢「無悔」之意。佢在香港參與政治咁多年，由早年的匯點到港同盟，再到民主黨，到頭來佢所支持嘅民主運動卻演變成街頭暴力和分裂中國的港獨，並且葬送咗好多年輕人的前途，將香港搞到覆水難收嘅地步，咁都「無悔」嘅話，呢種人連政客都不如，只能夠講係政棍。有破壞無建設嘅政棍，當然亦唔配做太平紳士。

至於單仲偕，據報獲得緩刑逃過牢獄之災後，已經好似好多黑暴黃友一樣出走。口裏面講「愛香港」，搞亂香港之後，拍拍籮柚離開，棄香港於不顧。呢種講一套做一套嘅虛偽，總係令人聯想到電話騙案真係層出不窮。

香港嘅授勳及嘉獎制度，係用嚟鼓勵和嘉許真係熱愛香港、服務香港嘅香港人。對於嗰啲對香港不負責任，參與或默許暴力，覺得外國月亮比香港圓，效忠英國美國多過效忠中國嘅人，香港政府嘅授勳早就應該對佢哋關上大門，而已經頒贈出去嘅太平紳士和星章榮譽，更要金睛火眼重新檢視，一有犯事，立即撤銷。楊森、戴耀廷等人今次被褫奪授勳嘉許，點講都好，雖然係撥亂反正嘅一小步，但都係大快人心嘅一件事！

 

原圖︰星島日報
https://std.stheadline.com/realtime/article/1844674/即時-港聞-楊森單仲偕戴耀廷遭-搣柴-港府褫奪楊單兩人太平紳士身分

https://std.stheadline.com/daily/article/2228538/日報-港聞-楊森-安榮-與民主黨無關係

https://std.stheadline.com/realtime/article/1183921/即時-港聞-修例風波-黑衣人中環掘磚設路障-警方要求集會立即解散

投票已截止，多謝支持