2019年黑暴動亂爆發，除了因為別有用心的政棍和外國勢力煽風點火，另一原因是黃色民粹主義在九七回歸後沒有得到有效遏制，結果得寸進尺，越演越烈，走向極端，最終令香港付出了沉重的代價。
中五男生林澤駿早前就其所就讀的東華三院黃笏南中學「禁止男生留長頭髮」的校規作出投訴，獲平機會受理並正處調停階段。這一投訴的舉動，彷彿又令人聞到了民粹無風起浪、找事發作的氣味，奇怪的是，平機會竟又願意配合演出，所以新聞一出，引起社會嘩然，在所難免。
校規禁止男生留長頭髮就是「性別歧視」？平機會受理這個投訴並進行調停的做法，實在令人難以理解。作出投訴的男生，自己拍片在社交平台公布已獲得平機會代為出頭，洋洋得意。這種事先張揚，借平機會向學校施壓，具有未審先判之嫌。這樣的伎倆手段和心思，大家係唔係有一種似曾相識嘅感覺？大家會諗起邊個？黃之鋒？又或者係佔中、黑暴前後嗰啲成日講到天花亂墜，做事橫衝直撞嘅激進學生？
大家都記得，黃之鋒係靠乜嘢起家的？冇錯，佢係靠反國教起家出名的。小混混闖出名堂，靠的是搵個似是而非的議題，嘩眾取寵，然後博上位。香港人見過鬼怕黑，心有餘悸，所以對類似嘅風吹草動，當然十分警惕，更加唔想見到平機會成為民粹再度發作的跑道。
有記者問平機會主席朱敏健為何會接受這個投訴，朱主席首先答道「外界不應作無謂猜測，以免影響個案調停」，然後又加一句「大家作無謂的猜測，雖則對平機會的專業處理，不會起到任何作用，但會影響到投訴人……」聽完這個月薪逾28萬元的朱主席四両撥千斤嘅回答，大家係咪有一種滴汗和無語的感覺？原來納稅人啲錢，真係咁容易賺，亦真係咁容易嘥！
國有國法，家有家規，校有校規，乃正常不過的事。但平機會卻連學生髮型、頭髮長短嘅校規都要管埋，呢個由納稅人辛苦錢資助嘅法定機構係唔係太過得閒？我唔想用「吃飽飯冇事幹」來形容，但喺呢件事上，我又一下子搵唔到更好嘅形容詞來描述。
中學生抗拒校規的髮型要求，這種瑣碎無聊的事，平機會原本就不應受理，如今卻陪一個堅持留長髮返學係「人權」嘅中學男生氹氹轉。作為公帑資助的法定機構就要接受社會監督，唔好諗住一句「外界不應作無謂猜測」，就可以敷衍市民。真金不怕洪爐火，如果呢個投訴真係合理，公眾輿論又點會咁大反應？平機會係咪應該檢討呢？教育界對平機會接納這個投訴反響十分大，就連好多市民都覺得平機會這次介入並不恰當，畀人一種不務正業和被人利用的感覺。
女生唔想着裙係咪又介入？
政府一年花一億多元資助平機會，唔係期望平機會去管一些學生應該着裙或着褲、頭髮應該留長或剪短咁瑣碎無聊嘅問題。今日有個男生話想留長頭髮，平機會就急急受理，聽日又有個女生話自己唔想着校裙，要求同男生一樣着校褲，咁平機會係唔係又要一視同仁地介入呢？如果真係咁，平機會咪好唔得閒，又要攤大手板問政府攞多啲錢擴充「業務」？
大家都知道，有些公營機構為了證明自己的「存在價值」，有時自己會陷入「數字迷思」 — 即係以收到和處理咗幾多宗投訴個案、成功率等，去證明自己「存在」。這是十分無謂和幼稚的陋習。一個公營機構係唔係做到嘢，幫唔幫到市民，對社會有冇助益，或反而成日為社會添煩添亂、製造爭議，市民心中其實都有一把尺，唔係淨係睇你數字高低。
早前平機會曾協助另一個案件，有幾個小學生取笑了一個同學（申索人），同學的父親向平機會投訴，平機會收到個案之後介入調停，惟涉事學生沒有出席。最終平機會代表申索人（由於申索人屬未成年人士，由父親代表）在區域法院提出法律訴訟，指4名小學同學違反《殘疾歧視條例》，要求4人向男童道歉，並賠償情感傷害。
平機會曾表示，就此個案提出法律訴訟，一方面是希望提高公眾認識《殘疾歧視條例》保障有殘疾的學生，在教育機構內免受殘疾騷擾，同時亦提醒公眾殘疾騷擾是違法的。但很多人都會覺得：小學生講錯嘢，點解會係用錢解決？小學生自己邊有錢？最終不就變成懲罰家長？
今次，如果最終被投訴的東華三院黃笏南中學，怯於平機會三個字而屈服投降，那麼全港所有學校的校規都可能要改寫，到時恐怕中小學校園到處都是披頭四的蹤影。而這個結果所引發的另一漣漪，恐怕是暫時蟄伏的黃色民粹主義，又會受到鼓舞，重新找機會發作了。
這是十分值得警惕的事！平機會的角色定位和風格，如果違反黑暴之後香港社會需要重回穩定的主旋律，政府該出手時就要出手。之前港台的冇王管、法援署濫批法援給黑暴的荒謬，經政府整頓之後，大致已經撥亂反正。所以對於今次投訴，大家亦要金睛火眼睇實平機會，如果它出現濫收投訴，助長民粹歪風的任何風吹草動，政府該出手時就要早出手，絕不能讓香港吃足苦頭的黃色民粹，又再搵到任何一根讓它能夠死灰復燃的稻草。
原圖：
https://hd.stheadline.com/news/realtime/hk/2265862/即時-港聞-朱敏健-歧視立法為雙向性-內地人歧視港人同屬違法
https://hd.stheadline.com/news/realtime/hk/2356558/即時-港聞-指禁男生留長髮涉性別歧視-中五男生向平機會投訴