博客

博客

撲滅「星火」充公7000萬 「革命水魚」識醒未?

施梓山 2022年10月01日 20:00

施梓山:「2019年嘅黑暴顏色革命離不開背後嘅黑金。呢個係一個深刻嘅教訓,令大家知道一場令社會動盪嘅連環大暴動,背後往往係有錢使得鬼推磨。嚟緊嘅23條立法,有需要對呢種引致社會動亂嘅黑金眾籌活動予以規管和加大懲罰,以堵塞法律漏洞。」

「今次充公『星火同盟』7,000萬元,將有關人等帶上法庭,或有關人等自己心虛先著草走佬,是一次很好嘅公眾教育,讓大家睇到香港動亂背後嘅真面目。但天網恢恢,疏而不漏,黑金騙局始終係騙局,始終都會有埋單嘅一日,『傑斯』係咁,『星火同盟』都係咁,稍後『612基金』會唔會係咁呢?撲熄眾籌自肥的星星之火,亦要對禍害社會的勢力斬草除根!」



👇 記得Follow 我哋 👇

IG: instagram.com/silentmajority.hk/

FB: fb.com/silentmajorityhk

Weibo: weibo.com/u/6655322587

Youtube: youtube.com/silentmajorityhk

最近睇涉及黑暴嘅法庭新聞,經常都有一種心情愉快嘅感覺,就如同最新嘅「0+3」放寬入境限制措施一樣,令人感覺疫情回復平穩,香港距離復常又近了一步。

以支援示威者為名設立的「星火同盟」眾籌平台,2019年曾經好囂張好出名。但有咁耐風流,就有咁耐折墮,四名成員最終因涉嫌洗黑錢,2019年12月被警方拘捕,銀行戶口的7,000萬港元亦被凍結。

由於有兩名被捕人已潛逃離港,警方日前根據《有組織及嚴重罪行條例》向高等法院申請沒收令,獲法官杜麗冰批准將這筆被凍結的7,000萬元全數充公。

7000萬元不是一個小數目。這筆巨款若用來搞亂社會,對香港的危害性有幾大,大家可想而知。法官一聲令下全部充公,將之撥入庫房成為公帑,減少對香港的破壞之餘,更可以造福市民,實在大快人心!

對於「星火同盟」呢類所謂嘅眾籌平台,只要稍為肯用客觀角度分析,都會好容易得出「好可能係騙局」嘅結論。但正如「刷單員」和「網上情緣」騙案一樣,雖然警方成日宣傳,但日日仍然有人被騙。

據警方調查所得,在2019年6月至11月期間,星火同盟一句「捐錢幫助手足」,短短半年收到的捐款就高達8,000多萬元。其中870萬元被轉往四個被捕成員的私人戶口,100萬元被用於購買私人保險及清
還私人卡數,另有340萬元被提取或轉往其他戶口,所以最後剩低約7,000萬元被凍結。

部份籌款被用作找私人卡數

籌款時講明「支援手足抗爭」,結果錢一到手,卻立刻變成咗找私人卡數和買個人保險。這究竟係點樣一回事,相信畫公仔唔使畫出腸,大家都心裏明白!黑社會電影裏面嘅「落格」,現實版嘅黑暴眾籌亦一樣照出現。呃捐款人錢,搵捐款人笨,公款私用,醜陋嘅畫面就係咁簡單。

其實類似嘅黑暴眾籌騙案並唔係第一單,亦唔係唯一一單。早前被控眾籌洗黑錢嘅網台主持「傑斯」,亦被揭發清洗超過1,000萬元犯罪得益。他已經認罪,現正等候判刑,並將被充公487萬元。

睇見呢啲龐大嘅數字,講親都幾百萬、過千萬元,而且經手人都可以輕易上下其手,從中獲利,你就會明白,原來支持黑暴啲人嘅錢真係咁容易呃。捐錢俾人找私人卡數、買私人保險,俾人當成「革命水魚」,你話情何以堪?所以呢啲捐款支持黑暴嘅人,佢哋最應該多謝警方拘捕騙徒,幫佢哋伸張正義。

而從「星火」呢件事上,亦可以從中睇到搞呢類黑暴眾籌平台嘅人,其實都係一班混水摸魚嘅烏合之眾。所謂「民主人權自由」、滿口「齊上齊落」、「手足」,背後真面目其實都只係人性嘅貪婪。就好似被捕嘅其中兩個人,已先後在2020年10月和去年3月潛逃離開香港,試問如果唔係「身有屎」,行得正企得正又使乜走佬?

2019年嘅黑暴顏色革命離不開背後嘅黑金。呢個係一個深刻嘅教訓,令大家知道一場令社會動盪嘅連環大暴動,背後往往係有錢使得鬼推磨。嚟緊嘅23條立法,有需要對呢種引致社會動亂嘅黑金眾籌活動予以規管和加大懲罰,以堵塞法律漏洞。

今次充公「星火同盟」7,000萬元,將有關人等帶上法庭,或有關人等自己心虛先著草走佬,是一次很好嘅公眾教育,讓大家睇到香港動亂背後嘅真面目。但天網恢恢,疏而不漏,黑金騙局始終係騙局,始終都會有埋單嘅一日,「傑斯」係咁,「星火同盟」都係咁,稍後「612基金」會唔會係咁呢?撲熄眾籌自肥的「星星之火」,亦要對禍害社會的勢力斬草除根!

 

原圖:https://std.stheadline.com/daily/article/2307108/日報-港聞-網台主持傑斯夫妻及助手被捕
https://hd.stheadline.com/news/daily/hk/1000819/日報-港聞-星火同盟-涉洗黑錢-高院頒令充公7000萬
https://std.stheadline.com/realtime/article/1839757/即時-港聞-612基金-吳靄儀等6人被控無限時內申請註冊或豁免註冊社團明提堂

投票已截止,多謝支持

發表意見

排列方式: