香港嘅法官泛黃，已經唔係一個政治偏見嘅問題，而係一個大家冇得再自欺欺人、必須認真面對嘅問題；如果我哋真係希望香港嘅司法獨立，同埋司法公正嘅優良傳統，可以繼續延續下去的話。
香港司法，尤其係法官對一國兩制認知偏差，判案政治立場先行凌駕法治嘅弊病，如果再唔進行一次刮骨療毒，香港嘅社會亂局，恐怕永遠沒有結束嘅一日。
我哋講法官偏黃，審案偏頗，當然唔係一竹竿打一船人，唔係話所有法官都係咁。但一個可怕嘅事實係，香港大部份法官，由去年六月開始嘅黑色暴動至今，種種不合常理，偏幫黑暴脫罪，幫到出晒面、過晒界嘅裁決，已經令人對呢啲法官失去信心。
大部份法官偏黃，縱容暴力，並非只係一般普通市民嘅偏見。最近，做咗18年裁判官嘅退休法官黃汝榮，也忍不住公開炮轟司法嘅弊病已經病入膏肓，令人痛心，佢話香港法官85%都係黃色政治取向，判案都係立場先行。前終審庭常任法官列顯倫更毫不客氣，直斥如今的法庭助長街頭混亂。
尋日從新聞睇到兩則有關黑色暴力嘅法庭新聞，雖然早已不存希望，但啱啱睇完仍然令人非常冒火三丈，再次驚覺香港嘅法官質素同埋公正，實在越來越叫人失去信心。
第一單案係咁嘅，九龍城法院審判一個18歲男生，今年三月在旺角堵路期間，將雨傘拋入垃圾桶內焚燒，被控縱火罪。案情簡單，被告又認罪，判案照理講並不複雜。
結果呢？裁判官竟要求索取被告的感化報告、社會服務令報告、更新中心報告、勞教中心報告、教導所報告、青少年罪犯評核委員會報告。冇錯，你冇聽錯，一單簡單不過的認罪案件，法官卻加加埋埋，要求索取多達嘅六份報告，這本身已經係一個笑話！結果埋單當然又係唔使坐監，只須18個月感化令！
第二單案係有關正在服刑嘅「佔旺女村長」畢慧芬。她被控去年7月10日在瑪嘉烈醫院襲擊罪和阻差辦公罪兩罪。有關法官昨日判處畢慧芬脫罪，「理由」是25歲的畢慧芬只有「9至12歲智商」，又話「若多啲包容、耐性和細心聆聽，相信事情唔會到如斯田地」......
聽到都好笑！如果「9至12歲智商」就唔使負法律責任，畢慧芬而家又點解會在監獄坐緊監？唔通其他判畢慧芬入獄嘅法官都犯咗錯誤？唔好唔記得，呢個畢慧芬有着「亮麗」嘅多次刑事紀錄，包括盜竊。法庭判案標準可以相差咁遠，大家又點會對法官有信心？
批評法官裁決，有些人總是反對，話係「藐視法庭」，話會「損害司法獨立」……但其實都係嗰句：法官唔係神，只係人。人係無完美嘅，也會有犯錯嘅時候，所以法官當然要受到監察。尤其喺而家呢個動盪時代，更不應再任由「警察拉人，法官放人」嘅情況出現。至於講到「司法獨立」，更不應成為法官自我膨脹，自以為司法一權獨大，就可以成為拒絕一切批評的擋箭牌。
睇見越來越多嘅縱容黑暴判決，而且判詞越來越離譜，你就會知道香港部份法官嘅水準和操守實在好有問題！
成立法官監察委員會和量刑委員會，加強監督法官，收回法官量刑權，就係對黃色政治上腦法官，冇王管判案嘅最有力反制。香港不能再讓一班黃官為所欲為搞亂香港了。瘀血該清就要清！
投票已截止，多謝支持
