12逃犯家屬鬧劇越演越烈！繼早前多位逃犯家屬聯同黃政棍開記招，無理要求特區政府協助引渡12逃犯返港不果後，佢哋周日（20日）又同黃政棍到灣仔警察總部報案，要求當局交代拘捕過程細節、以及公開雷達紀錄釐清被捕位置。
呢班逃犯家屬口講報警「求助」，卻要求釐清12人「到底喺邊度拉」，目的其實係想抹黑內地同特區政府，老屈中國海警「跨境執法」，企圖將12位棄保潛逃嘅逃犯，美化成「民主英雄」。不過大話始終都係大話，無論佢咃點樣洗白，都改變唔到12逃犯畏罪潛逃呢個事實！
請大家唔好忘記，呢班畀黃絲炒作成「英雄」嘅人，分別涉嫌干犯暴動、縱火、傷人、製造炸彈、私藏槍械及危害國家安全等嚴重罪行，條條都係重罪，個個都係重犯。事實真相就係佢哋為逃避法律制裁偷渡台灣，結果喺內地海域被中國海警拘捕，而海警亦係公佈消息當日，喺微博公開拘捕12逃犯嘅位置，係呢班逃犯家屬唔肯信咋。
俗語都有話，「裝睡的人永遠叫不醒」，喺黃絲黑暴眼中，中央同特區政府無論做乜嘢都係錯，無論點樣解釋佢哋都唔會信，就算攞證據出嚟佢哋都會話係「造假」。既然逃犯家屬都唔信政府，所謂嘅「報案」同「交代」根本就係笑話，不如叫美國佬搵GPS定位好過啦！
12位逃犯同家屬失聯，家屬報警要求警方搵逃犯，堪稱係世界奇聞！任何人係邊度犯法，就係邊度受審同服刑，12逃犯係內地海域犯法被捕，理應係內地接受審訊，服刑後才引渡回港受審，任何政府都無權干預。如果黃政棍真係有心幫助逃犯家屬，就應該帶呢班家屬返內地報公安，而唔係報警作政治炒作，食人血饅頭！
原圖：https://std.stheadline.com/realtime/article/1377915/%E5%8D%B3%E6%99%82-%E6%B8%AF%E8%81%9E-%E6%BD%9B%E9%80%83%E5%8F%B0%E7%81%A3-12%E6%B8%AF%E4%BA%BA%E5%AE%B6%E5%B1%AC%E8%AD%A6%E7%B8%BD%E5%A0%B1%E6%A1%88-%E4%BF%83%E8%AA%BF%E6%9F%A5%E4%BA%8B%E4%BB%B6;
https://image.stheadline.com/f/1500p0/0x0/100/st/1fba8b53e8f5ac4a41ddc0abf3a6977c/stheadline/inewsmedia/20180501/_2018050113573221907.jpg