支聯會副主席鄒幸彤連同3名支聯會成員早前召開記者會，反駁警方國安處要求提交資料是「濫權及不合理」，並否認支聯會是「外國代理人」，因此將拒絕交出任何資料，常委亦準備因此負上刑責云云。
看到被控煽惑他人明知而參與未經批准集結罪，目前仍在保釋中的鄒幸彤，帶着「五大訴求，決一不可」英文字母的黃色口罩，高調召開記者會拒絕提交資料，大家可以看到黑暴仍未散去，危害國家安全的勢力仍在負隅頑抗。
支聯會常委拒交資料，首先當然是因為「身有屎」。支聯會咁多年來有冇外國勢力參與其中，有冇接受外國或台灣政治組織的金錢資助，如果唔係因為「身有屎」，真金不怕紅爐火，又何須怕交資料畀警方國安處？所以唯一合理的理由就是自己心虛。
如果支聯會真係咁「光明磊落」，冇做過任何危害香港利益和國家安全的事，又何須怕交資料？支聯會係唔係「外國及台灣政治性組織代理人」，並唔係由支聯會常委開個記者會，話自己「唔係」就唔係，而係要由執法機構根據法律去檢視。如果個個正接受執法機構調查的團體和個人，隨便開個記者會話自己「無罪」就無罪，咁香港法治豈不是成為細路仔玩泥沙？
鄒幸彤之所以口硬說支聯會常委，已準備好因拒交資料而負上刑責，其實是夜行人吹口哨，除笨有精的計算。根據法例，任何人和團體不遵從警方按《國安法》發出的要求提交資料，可處以罰款10萬和監禁半年；如果提供虛假、不正確不完整資料，則可處以罰款10萬和監禁兩年。
唔交資料監禁半年，提供假資料監禁兩年，提供完資料如果被發現觸犯其他嚴重罪行或違反《國安法》，有機會被判更長的監禁年期。這可能是鄒幸彤和支聯會一班常委口硬，話自己唔交資料，準備負上刑責嘅真正原因。大不了坐半年監，好過坐幾年甚至十年監，這個恐怕才是支聯會常委心中的老謀深算。
但如此公然抗拒執法，當《國安法》冇到的如意算盤真係打得響咩？恐怕鄒幸彤和支聯會的頑抗份子，到頭來也是竹籃打水一場空，落得自欺欺人的下場。你唔交資料，國安處就不會主動出擊調查嗎？
此外，召開記者會的鄒幸彤和支聯會成員，在會上還在誇誇其談支聯會的解散程序，又話如果解散會將資產捐給理念相同嘅團體。呢啲講法同諗法，證明呢啲人仍未瞓醒。支聯會已經進入執法機構的視線，支聯會的資金往來有冇牽涉洗黑錢？有冇接受外國資助？警方未來一定會詳細調查，其資產唔係話支聯會常委想轉贈畀邊個，就可以畀邊個，所以鄒幸彤等人唔該唔好再成日發白日夢。
話說回頭，支聯會常委和其他成員，都應該為自己和支聯會想清楚，什麼是對自己和支聯會最好的落幕？跟着一個正在保釋候審的鄒幸彤氹氹轉，真係會有好結果？還是一子錯滿盤皆落索？鄒幸彤玩激進係因為佢自己已經身負控罪，支聯會其他常委跟住佢玩激進是想攬炒自己？
在目前香港撥亂反正的大環境下，支聯會壽終正寢只是時間問題，苟延殘喘有意思嗎？對抗《國安法》有好下場嗎？曾經在香港攪風攪雨、不可一世的教協和民陣等反中亂港組織，都已相繼解散，支聯會如今卻仍在解散的問題刁喬扭擰，開記者會妄圖反撲。睇嚟佢哋唔試過《國安法》嘅威力，佢哋都係唔會醒覺。但其實佢哋唔使擔心，相信警方國安處好快就會採取行動，一定唔會令佢哋失望！
原圖：now新聞截圖，香港支聯會Facebook
https://news.now.com/home/local/player?newsId=448732
https://www.facebook.com/hka8964/posts/4701901596510901
https://www.facebook.com/hka8964/photos/a.177772042257235/4505328269501569/