保安局局長鄧炳強早前警告，仍然有外部勢力圖謀利用香港影響國家，包括「軟對抗」及本土恐怖主義。
恐怖主義大家都知道是怎麼一回事，但「軟對抗」呢？好似有啲虛無飄渺，一般人未必有所警惕。但要分辨「軟對抗」其實也並不困難，最重要係睇佢嘅行為目的和場合。
最經典、最幼稚冇腦的「軟對抗」當然就係利用虛假安心出行程式，希望藉此擾亂政府的抗疫措施。灣仔入境大樓就曾經出現過有公務員使用虛假安心出行而被捕。其他諸如造謠、陰謀論、無理唱衰政府政策等，亦係黑暴黃友常做嘅「軟對抗」。一句講晒，佢哋嘅所作所為，就係唯恐香港不亂。
黑暴殘餘 伺機而動
最新的一宗「軟對抗」，發生喺金鐘嘅英國駐港總領事館外。英女王伊利沙伯二世去世，英國領事館設有弔唁冊供公眾悼念。9月19日晚，一名43歲男子突然在領館外，先以口琴吹奏英國國歌，引起在場一些人的圍觀起哄。這還不止，這名男子接着又用口琴吹奏涉獨歌曲《願榮光歸香港》，而現場過百人更紛紛舉起亮光的手機，一齊隨着音樂高唱這首涉獨歌。
據現場記者形容，這種場景就儼如2019年反修例動亂場景的重現。這就是明顯的「軟對抗」。2019年顏色革命失敗之後，黑暴殘餘勢力總係心有不甘，就好似毒瘡，間唔中就要伺機發作。
《願榮光歸香港》具有煽動叛變和分裂國家意圖，係眾所周知嘅事。尤其在公眾場合糾眾奏唱，涉嫌違法，亦係人所共知嘅事。所以有人明知故犯，擺明就係有心挑戰法律。尤其事件發生喺英國駐港總領事館外，靠攏外國勢力嘅象徵意義，以及眷戀英治情意結，就更加不言而喻，其影響當然亦更加惡劣。
一班人一齊喺英國領事館外，高調唱涉獨歌曲，擺明當《港區國安法》冇到，所以點可能冇後果？帶頭用口琴吹奏《願榮光》嘅男子，因涉嫌「作出具煽動意圖的行為」，違反《刑事罪行條例》第九條，日前已正式被捕。同時，有指警方國安處已經接手調查。
有人可能會覺得「唱一首歌」啫，使唔使「咁嚴重」？我唔想用婦人之仁來形容有呢種諗法嘅人，但香港今日重回穩定嘅局面，實在係得來不易，我哋冇理由再畀任何港獨黑暴嘅苗頭死灰復燃嘅機會。2019年打砸燒嘅動亂，放火燒活人，唔通大家想再重演？
事實上，一大班心有不甘顏色革命失敗嘅黃友，已經飛咗去英國效忠英王。點講都好，呢班人都叫做乾淨俐落，所謂道不同不相為謀，佢哋都尚算有自知之明，唔好留喺中國香港阻住地球轉。但與此同時，大家都知道有一班仍然留喺香港，但又不安心效忠特區、一國兩制和國家嘅黑暴殘餘分子，仍然無時無刻想在香港搞事。
嚴厲應對 確有必要
警方搗破黑暴軍火庫嘅新聞，周不時都會出現。大家見識過黑暴瘋狂，見過鬼怕黑，我哋冇理由再被幾粒老鼠屎搞壞了一鍋粥。黃友過去就係濫用自由，結果將香港帶入了暴動深淵，呢個教訓係十分深刻。
對港獨仁慈，等於對香港殘忍。所以今次迅速拘捕英領館外吹奏《榮光》男子，警方行動除咗無可厚非外，更係非常必要。
原圖︰星島日報
https://std.stheadline.com/daily/article/2487109/日報-港聞-英領館外奏-願榮光-男子涉意圖煽動被捕