中大日前舉行一年一度嘅畢業禮。

可以咁講︰間間大學嘅畢業禮，都係充滿喜慶氣氛，慶祝學生大學畢業，即將開始人生嘅另外一個新階段。但唯獨中大的畢業禮，卻年年總係令人要揑一把汗，擔心今年會不會又出乜嘢「狀況」，又會上報紙變成負面新聞。

過去3年，中大畢業禮年年都上報紙，但都唔係乜嘢正面嘅新聞。19年一批中大畢業生喺畢業禮戴上「暴徒豬嘴」，象徵自己係「暴大畢業生」。20年過百人喺畢業禮當日喺校內遊行，期間高叫「港獨」口號，之後多人被捕。到了去年，又有畢業生在畢業禮上進行快閃舉牌，聲援因「二號橋」暴動被判囚嘅「手足」。

原本大家諗住社會已經逐漸平靜，黑暴勢力亦冇好似以前咁囂張，今年中大畢業禮可以平靜返啲，點知結果又係事與願違。日前嘅中大畢業禮，結果又係上咗港聞版——校方報警，5個粗口辱罵保安嘅學生，被警員口頭警告後才自行離去。

話說日前嘅畢業禮，喺臨近黃昏嘅時候，喺圖書館「烽火台」附近，突然走出嚟幾個著住黑色垃圾袋製成畢業袍嘅學生，上面寫到一啲抗議口號，例如粗口諧音嘅「Canteen好L貴」，佢哋話自己正進行「行為藝術抗議」喎。

劣生所為極自私

係唔係「行為藝術」見仁見智，但呢班人嘅「行為藝術」破壞咗當日畢業禮嘅寧靜和氣氛卻係不爭嘅事實。一句「我係行為藝術」，係唔係就可以為所欲為、打橫嚟行呢？橫睇掂睇，呢班人都係自私嘅人！

一間學校嘅畢業禮係屬於全體畢業生，同埋佢哋家長嘅慶祝日子，點解幾個人一句「行為藝術抗議」就可以破壞成個典禮？要搞「行為藝術」，呢班人大可自己閂埋門搞個夠，點解要專揀嘅畢業禮呢個日子呢？呢種做法擺明就係騎劫！

但好戲原來還在後頭！由於「行為藝術抗議」事前沒有通告校方，中大保安員到來了解的時候，突然又跑出5個「旁觀學生」，佢哋初則與保安員口角，繼而以粗言穢語辱罵保安。唔使多講，「中大畢業禮粗口學生」又再成為新聞！

讀書唔等於有修養，高分都可以係低能，呢兩句話大家一定有聽過。無論點講都好，以粗口問候保安員，橫睇掂睇都唔會符合「博文約禮」嘅中大校訓。斯文人讀書係要以理服人，唔係以粗口傷人。況且，呢幾個粗口學生惡言以對嘅係保安員，居高臨下嘅言語侮辱，更加令人討厭。

值得一提嘅係，中大校園出入嘅防疫措施，例如掃碼、出示中大證件或訪客登記，全港唔少學校和機構日日都係同樣咁做，因為大家都需要為防疫和公共衛生盡一分力。其他大學嘅學生都冇因此「要生要死」，成日要抗議呢樣嘢，點解唯獨中大有一小撮學生會如此不可理喻？

而呢次粗口學生畢業禮鬧保安嘅事件，係中大校方報警，警察到來對有關學生作出口頭警告，佢哋自行離去之後落幕。但點講都好，呢幾個粗口學生破壞畢業禮氣氛嘅自私行為，令中大再次蒙羞已係不爭嘅事實。

中大校方今次果斷報警處理，合情合理。如果早幾年校方都係敢作敢為，或者今日大家對中大嘅觀感，已經係截然不同！

原圖︰大學社區報Facebook截圖

投票已截止，多謝支持