延綿兩個多月的香港黑衣暴動，背後有無數的物資支援，免費食物、食水、暴動裝備的口罩頭盔、地鐵飛、八達通任攞，燒不盡的銀紙，究竟錢從何來？無需「隱約」，只要唔係傻嘅正常人，大家都知道背後有個「幕後老細」。
著黑衫走上街嘅人，當然冇人會承認自己背後有個「幕後老細」。承認咗咪即係等於話自己冇腦，受人操縱，所以冇人會咁自摑嘴巴。此乃人之常情。
應該咁講，我都相信絕大部份上街遊行嘅人都冇收錢，只係為咗反對修例或表達對政府處理手法嘅不滿。但話雖如此，大家亦冇必要做鴕鳥。
睇住一大班黑衫軍有組織有預謀有嚴密分工，連續兩個月不間斷地製造大小不同的暴亂，有計劃地逐步將暴力和打擊香港經濟的行動升級，就連小小的公屋炸彈製造工場和港獨物資倉，隨便也可搜出幾十萬現金來，咪玩啦，話背後「冇大台」，冇幕後黑手，純粹be water，就算七月盂蘭節，都好難搵到有鬼信！
但呢個世界上，紙始終係包不住火嘅，係狐狸嘅始終也會露出尾巴來。
兩三個星期前，美國總統特朗普先話香港係中國一部份，相信中國可以自己處理好香港現時嘅「問題」。但才不過半個月，當香港黑衫軍連續兩日癱瘓香港國際機場，成功迫使超過一千個航班取消，影響三十萬旅客，每日造成超過3億港元損失，特朗普又立即跑出來說三道四。
前日，特朗普評論香港問題說「希望所有人鎮定和安全」，又說收到情報中國正調動軍隊到接近香港的地方，「希望沒有人傷亡」。睇到美國總統對香港呢種「關懷備至的關心」，「希望沒有人傷亡」嘅”菩薩心腸”，唔知點解，我毫無香港嗰啲「自由鬥士」或「義士」感恩載德謝主隆恩嘅感覺，反而即刻喺腦海中浮現咗「貓哭老鼠」四個字。至於後面嗰三個字，就算唔拜神，大家亦都接得上。
仲未夠48小時，特朗普又再「關注」香港起來。呢次美國總統又表演一次佢最拿手嘅「打倒昨日的我」俾香港人欣賞。特朗普話「如果中國希望與美國達成貿易協議，北京就應該先人道地對待香港。佢希望就香港問題與習近平舉行會談。」
不得不佩服我們的祖先有着洞透世事的智慧，和短短幾個字就點明要害的諺語。原來狐狸真係會露出尾巴來的！無論點收藏、矯情，狐狸始終就是狐狸。
特朗普早幾日先至話香港是中國的一部份，點解過咗幾日又話要同習近平會談傾「香港問題」？既然香港是屬於中國的內政，美國有乜角色？還要出動到美國總統來傾？如果美國的紐約、洛杉磯有持續暴動，中國國家主席話要同美國總統傾，要美國「人道地對待暴徒」，美國人會有乜感覺？感覺良好嗎？
己不所欲，勿施於人！中國外長王毅上月已經點名美國，請佢收起對香港的「黑手」。中國外交體現中國人禮義之邦嘅文化，先禮後兵。王毅都已經將話講到咁白，美國駐港外交人員卻仍然毫不避嫌高調會見港獨分子，擺明干涉中國內政，高度介入香港事務。狐狸不介意俾人睇見尾巴，所以住東涌公屋嘅羅冠聰可以在如今暴亂高峰期，依然若無其事高調飛去美國入耶魯讀博士。
政治有無形之手，國際政治嘅黑手更係無處不在。堂堂一個世界首強嘅美國，卻三日唔埋兩日咁「關注」香港，真係咁”好心”？特朗普將香港暴動亂局同中美貿易協議混為一談，要求談判，話美金冇介入香港暴動，話香港暴動背後美國冇角色，就算係盂蘭節都好難搵鬼信！
原圖：
http://std.stheadline.com/instant/articles/detail/1063816/%E5%8D%B3%E6%99%82-%E9%A6%99%E6%B8%AF-%E8%90%AC%E4%BA%BA%E6%8E%A5%E6%A9%9F-%E5%A5%B3%E5%AD%90%E4%B8%8D%E6%BB%BF%E6%8F%AE%E7%BE%8E%E5%9C%8B%E6%97%97-%E8%88%87%E9%9B%86%E6%9C%83%E4%BA%BA%E5%A3%AB%E7%88%AD%E5%9F%B7-%E7%89%87%E6%AE%B5
http://std.stheadline.com/daily/article/detail/1999748/%E6%97%A5%E5%A0%B1-%E6%B8%AF%E8%81%9E-%E7%89%B9%E6%9C%97%E6%99%AE-%E8%AE%8A%E8%87%89-%E5%86%8D%E5%8A%A0%E9%97%9C%E7%A8%85