一場黑衣人反修例，演變成持續暴力動亂，香港成為廿幾個國家的旅遊警示之地，早前連泰國都話要制定必要時派軍機來港撤僑的預備方案......相信好多港人包括你和我，都冇諗過香港會淪落到有咁嘅一日。
今日本文嘅題目叫做「有這種「醫護」，邊個敢畀佢醫？」，實在是有感而發，不吐不快。
黑衫激進分子的暴力，大家每個星期六日都有得欣賞，已經無需多講。但伴隨着暴力而來的黑白不分、專業道德淪喪的污煙瘴氣，正在快速蠶食我哋熟悉嘅香港價值，如果現在還不出聲反應，恐怕到時為時已晚。
有邊種「醫護」會叫人冇信心畀佢醫治？雖然好唔想講𠴱四個字，但仍然都要講，因為找不到更貼切的形容詞——就係「政治上腦」。尋日見到報紙報道，話東區醫院有700個醫護人員實名聯署，斥責警方「妨礙人道救援、剝奪示威者人權」，又話警察進入醫院範圍令醫護人員感到「人生安全受威脅」，並要求政府回應五大訴求云云。
如果東區醫院這700個醫護人員的行為發生在新加坡，又如果李光耀仍然在世，這些醫護一係會被豉椒炒魷，一係會因違反內部安全法而被帶上法庭。只不過因為佢哋好命，生於香港這個過分自由的地方，才會有如斯視自己專業道德如無物的放肆。
醫護人員最重要最神聖的職責是什麼？搞政治？支持暴力？還是要救急扶危，醫者父母心？醫院是搞政見表達的合適場地嗎？每1分每1秒有那麼多的生與死在哪裏發生，就算對政府不滿對政策不滿，大可以去上街去遊行，甚至學那個已經被炒的國泰機師去參加暴動，點解一定要利用醫院？
醫院係醫治人嘅地方，唔係搞政治發洩嘅地方。同樣，學校校園係讀書嘅地方，唔係搞政治鬥爭嘅場所。咁顯淺嘅道理，但偏偏在香港這一刻，好多人明知故犯，而且帶頭嘅仲往往係嗰啲話自己有幾「專業」嘅人。
這700個東區醫院醫護，「實名聯署」好似「好有勇氣」，實際是在破壞醫護專業的形象和信任。所謂醫者父母心，醫護人員救人是天職，應該不問膚色、貧富、政治顏色。這700個人在做什麼？他們利用自己的醫護人員身份發表政見，無理斥責警務人員「阻礙救援」，但對示威暴徒的瘋狂暴力卻隻字不提，反而極力維護暴徒的所謂應得醫治的「人權」。
想請問這700個東區醫護人員一句：你哋有阿媽生，暴徒也有阿媽生，唔通警察就冇阿媽生？這就是你哋嘅「邏輯」？有呢種咁仇警嘅醫護，香港警察及警眷若有頭暈身㷫，會敢將自己嘅身體交俾你哋醫治？對不起，你哋嘅實名聯署已經係一種表態，表明你哋嘅專業操守，即係醫德，已經令人失去信心！
人非草木，帶着政治有色眼鏡的醫護人員，仲點可能令人相信佢哋可以一視同仁地盡心醫治所有人，包括他們厭惡或者仇視的警察？記得612暴動之後，仁濟醫院和伊利沙伯醫院曾有當值的醫護人員，情緒失控地走去醫院警崗辱罵警員是狗。之後連串暴動被捕的，當中也不乏醫護。
為什麼之前國內記者付國豪在機場被暴徒捆綁毆打四五個鐘之後，送到瑪嘉烈醫院只住了一晚幾個鐘，隔日就要急急腳辦理出院，然後馬上被送去深圳醫院留醫了幾日？原因係對有強烈政治取向的醫護人員嘅醫德冇信心！
黑衣暴徒周街毆打不同政見市民，暴打「駁嘴」的士司機Van仔司機，甚至把有異議的地鐵女乘客大力推出車廂的醜陋畫面一再出現。政見上同暴徒聯合一致的那些醫護，在面對政見不同的病人和警員時，他們是否還能維持客觀專業的醫德盡力醫人，實在很令人懷疑。所以網傳有警務人員要求受傷時，可進入解放軍醫院醫治，完全可以理解！
投票已截止，多謝支持